اسٹیٹ بینک پالیسی کے تحت کم لاگت گھروں کی تعمیر کے لیے قرضے دے گا گورنر اسٹیٹ بینک

اسلام آباد:جدت ویب ڈسیک :: گورنر اسٹیٹ بینک طارق باجوہ نے کہا ہے کہ اسٹیٹ بینک آف پاکستان پالیسی کے تحت کم لاگت گھروں کی تعمیر کے لیے قرضے دے گا۔
تفصیلات کے مطابق اسلام آباد میں گورنر اسٹیٹ بینک طارق باجوہ نے تقریب سے خطاب کرتے ہوئے کہا کہ اسٹیٹ بینک پالیسی کے تحت کم لاگت گھروں کی تعمیر کے لیے قرضے جاری کرے گا۔
طارق باجوہ نے کہا کہ 30 لاکھ روپے لاگت تک گھر کم لاگت گھروں کے زمرے میں آئے گا۔
گورنر اسٹیٹ بینک کا کہنا تھا کہ بینک کم لاگت گھر کی تعمیر کے لیے غریب آدمی کو کل لاگت کا 90 فی صد قرض دے گا، بیوگان، یتیم، شہدا، خواجہ سرا اور دہشت گردی سے متاثرہ افراد کو ترجیح دی جائے گی۔
اسٹیٹ بینک کے گورنر کا یہ بھی کہنا تھا کہ کم لاگت گھروں کی خرید و فروخت اور کرائے پر دینے کی پابندی ہوگی۔
انھوں نے کہا کہ کم لاگت گھروں کی تعمیر سے روزگار کے بے پناہ مواقع پیدا ہوں گے، رواں سال زرعی شعبے کے لیے بھی 1250 ارب روپے کے قرضے دیے جائیں گے۔ خیال رہے کہ آج اسلام آباد میں کم لاگت گھروں کی تعمیر سے متعلق تقریب منعقد ہوئی، جس میں وزیرِ اعظم عمران خان نے کہا کہ شہروں میں موجود کچی آبادیوں کے لیے آج تک کسی نے نہیں سوچا، کچی آبادیوں میں رہنے والوں کو فلیٹس بنا کر دیں گے۔

Leave a Reply

Your email address will not be published.